So, mir händs doch no gschafft, zum en zensurierte Bricht schriebe!

Also nach de Schlammschlacht, de Duschi vo obe und ganz vill Bier, Bier, Bier und Tequilla, Tequilla .......sind dänn die einte doch e chli ruhiger worde.

Nach beachtlichem Seegang und Müeh mit em Mul finde isch doch scho de erschti, Gorre (Name vo de Redaktion g'änderet), bim brünzle is Gras gläge und dänn ganz ahständig hinders Auti go ligge! Die andere händ no flissig wieter Tanzt, gschlafe oder sind eifach gsi. De z'Nacht isch e echti Überraschig gsi! Uf em Wäg is Fäschtzelt hät eus und nachher vor allem de Gorre, Tiziana überrascht. Isch e chli pinlich gsi für euse Gorre!!! Uf jede Fall hätt jede sin Täller voll Gschnetzeltem gha und isch fliessig am ineschufle gsi, da hätt doch de Gorre sin Täller no chli welle fülle! (Isch echt e chli knapp bemässe gsi?) Will aber de Täller doch scho rächt voll gsi isch, hät er hald de Bode und die eignig Turntäsche hinder im e chli verschöneret!

Wo dänn doch all ihre Z'nacht, jede uf sini Art, gässe gha hät, isch es wiede zrugg zu eusem Stammplätzli gange. Langsam händ mir eus dänn parat gmacht. Mit Wägeli und allem drum und dra händ mir für gueti Stimmig im Bus uf em Wäg zu de Spielnacht gsorget. I de Halle ah cho, sind mir doch chli verschrocke. Tote Hose isch nur de Vorname! De Sergio und de Fäbe händ schnell für Abhilf gsorgt. De Sound voll ufdreht, isch scho bald e rächt lässi Stimmig gsi. Showilag vo eusne Manne, im Handstand vürschi laufe (de Peter hät e chli müeh mit vürschi und hinderschi) isch Stimmig usse vo de Halle fascht übergschümt.

Spielnacht............e neue Erfahrig bi eus Aktivriegler. Mir händ die Ufgab aber mit vill Elan uf eus gno und wacker mitgspielt. Ich würd säge, mir händ en riese Plausch gah (die andere villicht nöd immer) euses Beschti geh und mit understützig vom Soundwägeli isch eus au mänge guete Spielzug glunge. Zum Schluss (oder am morge früh) hätt dänn d'Nicole no d'Nase zforderscht gha. Zum Glück isch nöd all zu vill passiert und sie hätt de Sternehimmel mal ganz nöch chöne bewundere. Nomal alles Gueti, de Peter übernimmt die ev. Choschte für e Naseoperation!

Nach eme feine Düscheli und em Kafi isch es dänn scho wieder retour zu eusem Stammbeizli vom Heinimaa gange. Z'morge ässe ohni Showilag vom Gorre (wie langwielig) und ab gahts zum Fäschtumzug. Nach einigem genörgel (sorry Pimin) händ mir dänn all eusi Plätzli igno und wäred parat gsi. Leider händ d'Organisatore no chli meh Ziit brucht und so sind mir gschtande, gsässe, gläge und wieder gstande............ Endli isch dänn vorwärts gange und trotz Genörgel und langem Warte isch es no luschtig gsi. Aber zum Glück häts underwägs no e paar Toi Toi gha und au no chli Flüssigs.

Am Sunntig sind mir dänn wie üblich vo villne Lüt und Verein am Bahnhof abgholt worde und durs Städtli gloffe. A de Führwehrchilbi hätts dänn wiedermal vill Flüssigs aber au en feine z'Nacht geh. Langsam sind die einte Hei go mal wieder chli schlafe oder eifach sich i de Badwanne ufweiche! Die andere händ no dankbar d'Iladid vom Töggeli ahgno, well me chan doch so e ahbruchti Nacht nöd eifach abbräche. Nomal Danke für Spis und Trank.

Ich dänk, ich sprich allne Teilnehmer us em Herze wänn ich da säg: Wiedermal e glungnigs Turnfäscht / Eidgenössischs, wo all ihre Spass gha händ.