zurück zur Übersicht der Berichte
Fritig, 21. Juni 2002
Wieso schtan ich am halbi sächsi uf, zum am halbi elfi am Wettkampf-Platz Schaukelring turne, wänns 100 m näbed em Grüscht en Parkplatz hät? Vermuetli will mer alli mitenand mit em Äxtrazug händ well gah. Wo ja zwar Platz reserviert gsi isch, aber dänn glich nöd alli händ chöne hocke. Aber das isch ja Wurscht, will MIR GÖND AS TURNFÄSCHT, JUHUIII.
S'Wettkampf-Gländ isch leider nöd g'eignet gsi für euises Wägeli, will's halt ebe no vorhär gschiffet gha hät und volle Furche und Holzschpöhn etc. gsi sich. Aber trotzdem, s' Wägeli isch wie immer vom Sergio und Fabian behüetet und vo allne andere beschtunt worde. Eifach demit das au emal gschribe isch: mir sind zwar nöd die Beschte, aber sicher die Geilschte mit dem Wägeli. Koma. So hämmer s'Wägeli halt vill müesse träge und de CD-Player hätts scho chli fescht duregschüttlet.
Churz vor de Schaukelring-Vorfüehrig simmer aber alli in en totale Schock ine grasslet. Dä Sven. Wo isch dä Sven? Dett. Ja, genau, dett, mir gsend en alli. Chas en sii, oder isches e Fata-Morgana? Doch es ischen. Brutal. Er isch da. Was machemer jetzt? Am Beschte ebe jetzt ihn genau döt isetze, wommer en plant händ und dasmal ebe KEIN Ersatz go rekrutiere oder alli Übige no umschtelle. Das isch für vili wahrschindli scho chli vill gsi, und drum simmer leider nöd ganz a euisi bescht Leischtig anecho. Zwar kei Übigsfähler, aber bi de Synchronität hämmer sicher nöd brilliert, und bi de Note vo 8.86 simmer scho grusig ad' Kasse cho, wämmer d'Leischtig mit andere Verein verglicht.
Aber scho e Schtund spöter simmer bereit gsi für eusi Grätkombi. An Sven hämmer euis bereits gwönnt gha, und alles isch au würkli guet gloffe. D'Note vo 9.55 laht uf e grosse Zuekunft mit dere Truppe und dene Übige hoffe.
Bi dä Pändelstaffette simmer total cool anegange, will das hämmer ja sch x-tusig mal trainiert. Jede hät sini persönliche, uf sin Fuess härgschtellte Hochleischtigs-spezial-Keramik-Windkanal-optimierte Sprintschueh a d'Füess anemache lah und dänn simmer das absolut 100-%-ig iitrainierte Programm abgloffe, wommer i eusne Hirni iiprägt händ wie biertrinke. Es hät nüt chöne schiefgah. Fascht nüt. Dä Sven. Er hät da Chopf zu dä Niederhasler Fans müesse trülle währende em Sprint, und das hät euis die zwei Hundertschtel koscht, wo im Training s'bescht Resultat gsi isch. Aber trotzdem simmer uhuere schnäll gsi. Mer seit mer hegs chöne mässe. Vo 1 Min 23 Sek und öppis isch d' Red gsi. Aber das mues dä Nachwind gsi si, will euisi Körper sind sicherlich scho vill voredhär im Ziel gsi. Vor allem bim Bier trinke nachhär hämmer über die Ziitmässig-Fählleischtig vill diskutiert und mir sind euis so total sicher worde, dass es nöd a euis gläge isch.
Die Leischtige händ dänn scho no chli müesse gfiret werde, und rund um euises Wägeli und um euisi Schtimmigsmacher Sergio und Fabian isch das au keis Problem gsi. Wo's dänn no agfange hät schiffe wie us chüble, händ die einte dänn au nümme müesse go dusche i'd Halle, das isch grad vor Ort erlediget worde.
Und dänn isch no meh gfäschtet worde, aber dä Bricht mues z'erscht no zensuriert wärde.
Mrgh Rudin